ရွင့်လီနန့်မိုးစီစီငှက်

လီတိုက်ခတ်မှုသည်သဘာဝ။ ငှက်တိတောင်ပန်ခတ်ယင်းနန့် လီထဲမှလွတ်လပ်စွာပျံသန်းနိုင်ကပ်သည်။ ပျံသန်းမှုဘ၀နန့်ရပ်တည်ပနာ ငှက်လောကကိုကျင်လည်ချင်ရေဆန္ဒနန့် မိုးစီစီငှက်တစ်ကောင် ဝေလီဝေလင်းစကပင်ခရီးနှင်လာခသည်။ အရှိ(ဟြိ)ဘက်ထန်းတောက သူ့ဇာတိနိန်ရာ။ ပျံသန်းယင်းလမ်းဘေးကဖုန်းကြိုးတန်းမှာရပ်ပနာ အညောင်းစကေဖြေလိုက်သည် ။ တခါတလီတွိခရရေလီပွီအောက်မှာကလိန်သီးခတ်ခရရေအကြိမ်ပေါင်းကလည်းမနည်းမနော ။ ထန်းတောထဲက ရိက္ခာတိနန့်သူ့ဘ၀ရှင်သန်လာရသည်ကို အောက်မိယင်း လမ်းတွိစမ်းချင်စိတ်နန့်လိုရာခရီးကိုဆက်လျှောက်ဖို့အားသန်လာသည်။ ကြမ်းတန်းရေ ထန်းလက်ထန်းခက်တိထက်မှာနုညံ့ရေငှက်သိုက်နန့်ကြီးပြင်းခရသည်။အေနိန်ရာသည်ပင်တခါကသူ့ဘ၀ခိုလှုံရာ။ ကွင်းပြင်မှာအပျော်ပျံနိန်ခရေ အကွာအ၀ီးကို ခရီးတခုအဖြစ်ပြန်ပြောင်းကြည့်ကေ ပေါက်လိုက်လိမ္မယ်ခရီးဖြစ်ခြင်း၊ ခရီးပမာဏကိုမှန်းဆယင်းနန့်တွက်ချက်မိခ ။ ထိုးထွက်လာသောဝါးတစ်ပင်ကခွာချပခရရေ၀ါးပတ်တိအတွက်နှမြောလို့မရရေပိုင်၊ ၀ါးဆစ်ဖြစ်ပေါ်လာခြင်းသည်လည်းပုံမှန်သဘာဝပင်ဖြစ်သည်။ အာကာထက်မှာပျံပနာလီဟုန်စီးနိန်ရေ ဒေါင်းရန်ငှက်ကိုအားကျချင်ကေလည်း အင်အား၊လုပ်ရပ်နန့်ရလဒ်ကိုတော့ချင့်ချိန်နိန်မိရေ။ ဗျိုင်းဖြူချေတိပိုင်တောင်ပန်ဆန့်ယင်း တငြိမ့်ငြိမ့်တာဝီးပျံနိုင်ပါဖို့လားစိုင်းစားယင်း မတူညီရေခရီးလမ်းကြောင်းတိနန့် လျှောက်လှမ်းသူရို့၏ခရီးဆုံမှတ်ကရွီးခြယ်မှုကိုမူတည်ပနာထပ်တူညီသောသဘောတ ရားဟိကောင်းဟိနိုင်သည်ကိုလက်ခံမိသည်။ ခရီးထွင်လျှောက်ရို့အတွက်ခရီးပေါက်လီစိန်ခေါ်မှုတိကပိုများလီဖြစ်သည်။ ငှက်တစ်ကောင်အတွက်ပျံသန်းနိုင်မှုသည်သဘာဝလက်ဆောင်တခုပင်။ လီပွီအောက်မှာပျံသန်းရခြင်းက စိန်ခေါ်မှုတခုဖြစ်နိုင်ရေပိုင်တွန်းအားတခုလည်းဖြစ်နိန်ခသည်။ အေပိုင်စိန်ခေါ်မှုတိကပင်ခရီးရောက်ဖို့ဆွဲယူလာခသည်။ ပျံသန်းယင်းလွတ်လပ်နိန်ရေငှက်ချေတစ်ကောင်၏မဖြစ်စလောက်အတွီးအခေါ်ချေတိနန့် လှောင်အိမ်မဟိရေ အာကာပြင်အောက်မှာ မွန်းကြပ်နိန်ရေခံစားမှုတိက အစိုင်အလာတိကို ပုံတူကူးချဖို့အားမသန်နိုင်ခ။ မိမိလိုရာခရီးကို ကိုယ်တိုင်ရွီးခြယ်ပျံသန်းကပ်ရသည်။ ခြုံထဲမှငှက်ချေတစ်ကောင်မှာလည်း လိုရာခရီးကိုပျံသန်းဖို့လွတ်လပ်စွာ ရွီးခြယ်ခွင့်အပြည့်အ၀ဟိသည်။ လုပ်နိုင်စွမ်း၊ရင်ဆိုင်ရမည့်အခက်အခဲနန့်သက်လုံအားကောင်းမှုတိကို မိမိကိုယ်တိုင်နားလည်ရမည်သာ ။ လီပြင်းတိုက်နိန်တုန်းမှာတနားချေရပ်ပနာ၊လီကြောင်းနန့်လိုက်ပါပျံသန်းတတ်ဖို့လည်းလိုကောင်းလိုအပ်နိုင်သည်။ မိုးစီစီငှက်တိအမြင့်ပျံနိုင်ပနာ နှင်ရာခရီးကိုရောက်နိုင်ကပ်ပါစီ။

လေးစားစွာဖြင့်
စတိုး (၁၀ ၁၀ ၂၀၀၉)