အလုပ်ချေ အကိုင်ချေနန့် အတည်တကျဖြိုက်နိန် ယာဆိုဗြီးကေ ကျောင်းဆရာကျော်ရွှေရီး တယောက်အိမ်ထောင်ရက်သားချေချဖို့ စိတ်ကူးပနာ ရွာထဲက ရည်းစားသယ် မဇင်ညိုဖူး ကို မယားခိုးလခစော် ရွာထဲမှာ စပယ်ရှယ်သတင်းထူးအဖြိုက် လူတိုင်းနှုတ်ဖျားမှာ ရီပန်းစားလျက် ရှိသည် ။ ဇင်ညိုဖူး အဖသည်ကတော့ တဦးတည်းသမီး ကိုမယားတက်မတောင်းလို့ ဆိုပနာကောင်းကောင်း ရင်ဆာနိန်သည် ။ ဇင်ညိုဖူး ဘကြီး သူ့အစ်ကိုသယ် (ဘုရားတကာ) ၀င်ပနာ ဖျောင်းဖျ၍သာ စိတ်ဖြေလိုက်ရသည်။
ကျော်ရွှေရီးက ကျောင်းဆရာ အနိန်နန့် စာအသင်အပြကောင်း ၊ စေတနာ အပြည့်အ၀ ဟိရေ ဆရာတယောက်ဖြိုက်သော်လည်း နိန်ထိုင်မှု အပိုင်းမှာလွတ်လပ်မှုကို ပိုတန်ဖိုးထားတတ်သည် ၊ ကျောင်းသား၊ကျောင်းသူချေတိကိုစည်းကမ်းဘောင်ထဲမှာလွတ်လပ်မှုဟိအောင်နိန်ထိုင်တတ်ဖို့ လမ်းညွှန် လေ့ဟိသည် ၊ လူငယ်ပီပီ တခါတရီ သောက်စားတတ်သည်။ ယပိုင်နန့်နောက်တပတ်ကြာကေ ပင်လူကြီးမိဖ တိကို မဟာမိတ်ဖွဲ့ ပနာမင်္ဂလာဆောင်ဖြစ်သည်။ ကျော်ရွှေရီး ယောက္ခထီးက မုတ်ဆိုးကျော်တယောက် ဖြစ် သည်၊ သို့သော် အရက်သမားဆိုကေ တစိချေလည်းကြည့်မရ ၊ အရက်နံ့က သူ့အတွက် အခံရအဆိုးဆုံး ဖြစ်သည်။
နွီရာသီကျောင်းပိတ်ရက်တရက် ကျော်ရွှေရီးတယောက်ရီချိန်များလာသည် ။ မယားသယ်က အကြောင်းသိ၍ အိပ်ရာအယင်ဝင်ဖို့ အကြံပီးယင်းမျက်ခုံးခလှုပ်လှုပ် ဖြစ်နိန်သည် ။ အကြောင်းကကျော်ရွှေရီး အရက်မူးကေ ယောင်ပနာ …ကော်နှက်တတ်သည် ။ အယင်တစ်လကစပနာ ရွာထဲမှာ ကော်နှက်ကေ ဒဏ်ရိုက်ခံရဖို့ ဆိုပနာ စီးကမ်းထုတ်ထားသည် ။ အေစီးကမ်းကို ဇင်ညိုဖူး ဘကြီးသယ် ရွာလူကြီး ဘုရားတကာက အကြံပီးထားခြင်းဖြစ်သည်။ ဇင်ညိုဖူးအဖသယ်က ပြင်လဂေါင် ကအပြန် ကျောင်းဆရာ ချခရော်ပြန်နိန်စော်တွိကေ ပင် “ အစိကေ အေနိန့် နင့်ယောက်ကျားကျောင်းဆရာ စာမိလာဟန်” ဆိုပနာ ခပ်တည်တည်နန့် ပြောလိုက်ယာ …ခမျှိုင်မျှိုင်ချေနန့် အိပ်မပျော် နိုင်သိမ့်ရေ ကျော်ရွှေရီးက “ မင်းမင်းမှာ လူကိုယာပြောယာ ကိုယ်ကို နိန့်တိုင်း ငှက်ပိုက် ၊ရှဉ့်လိုက်နန့် အကုသိုလ် လုပ်နိန်စော်ကျကေ ကောင်းဟုတ်ရေ ထင်မနိန်ကေ့ ” ဆိုပနာ ပြန်ပြောလိုက်စော်နန့် ၊ စိတ်ကြီးရေ ယောက္ခမသည်က “ အဝေ ကျောင်းဆရာ မတ်ငါ့ကို အေပိုင်ပြောရေ ၊ မတ် မစားလားငါ ရှာဟင်းကိုယကေ ၊ အားမနာ လိုက်တေဝေ …မတ်အဂုငါ့ အိမ်ထက်ကဆင်းဝေ… ” ဟုအော်လိုက်သည်။ ဇင်ညိုဖူးရို့ သားအမိက သမီးယောက္ခမ နှစ်ယောက်ကြား ၀င်ပနာဖြေရှင်းပီးလို့ စစ်ပွဲက စကေငြိမ်လခသည်။ ကျော်ရွှေရီးလည်းသတိဝင်လာပနာ “အေနိန့်တော့ မဆင်းနိုင်ယာ မင်းမင်း နက်ဖြန်မှ…..” ဟု တောင်စိုင်ရီ မရ ထပြောလိုက်သည်။
အချိန်က ညဉ့် ၁၁ နာရီခွဲလောက်ကျော်ရွှေရီးတယောက် လက်စွမ်းပြလိုက်တေ“…. ” ။ မယားသယ်က သတိပီးလိုက်တိုင်း “ဘုရား ဘုရား …” နန့်ပင်ယာ ။ ဘေးနားအိမ်က ဇင်ညိုဖူး ဘကြီးသယ်ကတော့ အေနိန့် ခါမှ ဘုရားစာဖတ်သံက ပိုကျယ်နိန်သည်။
ညဉ့်ခင်း ဖက် ၁ နာရီလောက် ဘုန်းကြီးကျောင်းက ရွာစုဖို့ တုန်းမောင်းခေါက်ကေ ပင်ကျော်ရွှေရီးတယောက် ရွာစုရေနိန်ရာသို့ လာလိုက်သည် ။ထင်ရေ အတိုင်း ညကကော်နှက်ရေလူတိစာရင်း ကို စုံစမ်းရာ ကျော်ရွှေရီးနာမေ ကမသေမချာ သက်သီမဟိဖြစ် နိန်သည်။ ယင်းအချိန်မှာ ပင် ဇင်ညိုဖူး ဘကြီးသယ်က နောက်တယောက်ကျန်သိမ့်ရေ ဆိုပနာ အမှန်ကို ပြောလိုက်ယာ လူတိအားလုံးပင် အံ့သြနိန်ကပ်သည်။ ကျော်ရွှေရီးက ကိုယ့်အကြောင်းကိုသိ၍ ငြိမ်နိန်လိုက်သည်။
အေနိန့် ရွာစုကပ်စော်မှာ ကျော်ရွှေရီးသတင်းကနာမေကြီးလို့ ပြင်လကောင် မှာ အနိန်များရေ သူ့ယောက္ခမသယ်လည်း အားလုံးသိ နိန်ခသည်။ ညစာဖက်ထမင်းစား ဗြီးကေကျော်ရွှေရီးတယောက် ယောက္ခထီးခေါ်၍လိုက်ပါလခသည် ။ ယောက္ခမသယ်က သူ့အစ်ကို အိမ်ဦးတည်လားနိန်သည်။ အိမ်ရှိအရောက်တွင် “အိုဘုရားတကာ တချက်ဆင်းပါခ…”ဟုခေါ်လိုက်ရာ ၊ မှင်သီသီနန့် သူ့အစ်ကိုသယ်ဆင်းလာကေ ပင် “ ကိုကြီး အေသူကို အစော်အ ငြိုးတိနန့် ဒဏ်ရိုက်ရောင်…၊ ညကငါ ဘုရားရှိခိုးနိန်လို့ မကြားလိုက်ဆိုကေလည်းရယင့်သားနန့် …” ဟု ပိတ်ပြောလိုက်သည်။ ယေအခါမှာ သူ့အစ်ကိုသယ် က “ မဟုတ်ဝေ အစိကေ ငါ့မှာအမှန်ပြောရဖို့ တာဝန်ဟိရေ ၊ အေရွာမှာ ငါလူကြီး…” ဟုပြန်ဖြေသည်။
“အမိယေ ကိုကြီးတချက်ပြောမနိန်ကေ့ ကျောင်းမှာ ဥပုဒ် စောင့်တေ ၊အိမ်ရောက်ကေ လက္ဖက်သုတ်စားရေ ၊ အချိုရေသောက်တေ ၊ ယေဗြီးကေ ဟိသိမ့်ယင့် … နိန့်တိုင်း ကွမ်းသီးခင်းထဲမှာ ရှဉ့်တိကို ဆောက်ခတ်နန့် ပိုက်နိန်စော်ကို လူတိမသိ မထင်ကေ့ …. ပြောခီကေ ဘုရားတကာ ” ဟုကျော်ရွှေရီး ယောက္ခထီးက စိတ်ပေါက်ပေါက် နန့် ပြောချလိုက်သည်။ အစ်ကိုသယ် ဘုရားတကာလည်း စိတ်တိုလာပနာ “ အဝေ အစိကေ မတ်ရို့သမီးယောက္ခနှစ်ယောက် ငါ့ကိုရန် ရှာဖို့လာလားဝေ… အေပိုင်မျိုးကားပျင်းရေဝေ… ” ၊ “ကျော်ရွှေရီး မတ်လည်းကျောင်းဆရာဖြိုက်နိန်လို့ယာ မဟုတ်ကေ လွယ်လီဖို့ မဟုတ် …” ဆိုပနာပြောဗြီးကေ ခတောင်းကျိုက်လိုက်ရာ မှင်အပြည့်ထိုးထားရေပေါင်နှစ်ချောင်းမှာ မှင်တိက ခရှုပ်ရှုပ်ခံနိန်ရေ အရီတိထက်မှာ ပီပီပြင်ပြင် ကိုပေါ်လာနိန်ခသည်။ ကျော်ရွှေရီးလည်း ခပ်တီတီနန့် “ ဟုတ်တေ မင်းမင်းပြောရေ ပိုင် အယင်တရက်နိန့် ညစာဖက်က မင်းကြီးဥပုဒ် တန်းလန်းနန့် ကွမ်းသီးခင်းထဲမှာ ရှဉ့်တိကို ဆောက်ခတ်ပိုက်နိန်စော် ကျနော်တွိခရေ…” ဆိုပနာ ၀င်ညှောင့်လိုက်ကေ ပင် ဘုရားတကာက အကျင့် အတိုင်း ဆောက်ခတ်ကောက်ဖို့ ပြင်လိုက်သည်…။ ယပိုင်ဆိုစော်နန့် ဘေးနားမှာဟိနိန် ကပ်ရေ လူတိအားလုံးဝင်လာပနာ ဆွဲကပ်ရသည်။ ကျော်ရွှေရီးလည်းအေနိန့် ကစပနာအရက် ပြတ်လခ သည်။
မည်သူ့ကိုမျှမ ရည်ရွယ်ပါ ။ စာလုံးပေါင်းနန့် အသုံးအနှုန်းတိမှာနိန်ကေ အမှန်ပြင်ပီး ၊ ဆွေးနွီးပီးကပ်ပါ ။
အားလုံးပျော်ရွှင်နိုင်ကပ်ပါစီ။
လေးစားစွာဖြင့်
စတိုး ( ၃၀ ၊ ၈ ၊ ၂၀၀၉ )
No comments:
Post a Comment